Denboraren galbahea igaro ez duten eta bidean galduta gelditu diren idazleak eta idazlanak berreskuratzeko asmoa izanen dugu Lerro galduak sekzio berrian. Generoagatik izan, klase sozialarengatik izan, zegokien tokian eta zegokien garaian egoten jakin ez zutelako izan, ahanzturaren sarean ez atzera ez aurrera gelditu diren sortzaile horietaz ari gara. Nortzuk dira literaturako ahaztuak? Zeintzuk berreskuratu beharko genituzke gure literaturaren historiarako?
Lehenengo sekzioan Irati Jimenez izan dugu bidelagun eta amabitxi. Bere eskutik, Augustin Anabitarte idazle donostiarraren ekarpena ezagutu dugu, Jimenezen iritziz eleberrigintzan atzeman beharreko lanak idatzi zituenak. "Ez da horretan atzindaritzat hartu eta gure literatura honetan hain berantiarra izan den genero honetan kontutan hartu beharreko idazle bat izan da Anabitarte".
