Garabide Kultur Elkarteak antolatutako Hizkuntzak Biziberritzeko Formazio Programaren baitan, 13 komunitate ezberdinetatik etorritako 18 hizkuntza-aktibista iritsi ziren Euskal Herrira irailaren 20an. Sei astez ibiliko dira euskaren sustapenean lanean dauden elkarte eta erakundeekin haien esperientziak partekatzen. Nafarroan Errigorako proiektua ezagutuko dute Tafallan, Laba kulturgunean bisita egingo dute Iruñean eta Irurtzunen solasaldia egin berri dute.
Programaren helburua, hizkuntza gutxituak biziberritzen ari diren munduko hainbat komunitatetako ordezkariak euskara indartzeko estrategietan formatzea da. Bestetik, euskal jendartea hizkuntza aniztasunaren eta hizkuntza gutxituen egoeraren inguruan sentsibilizatzea bilatzen du Garabidek.
