Ibañetako pasabidea, Nafarroako pirinioetan, mendien bi isurialdeak konektatu dituen bide historikoa izan da mende luzez. Bihar, ostirala, Aranzadi Zientzia Elkarteak antolatuta gai honen inguruko hitzaldia emanen du Oihane Mendizabal Zalduako indusketa guneko zuzendariak, Ibañetako pasabidea eta bere inguruak duela 2000 urte izenburupean. 19:00etan ezarrita dago hitzordua, Aezkoako Kultur Olan.
Aztarnategiaren zuzendariaren aburuz, "garrantzi handiko galtzada" izan zen Ibañeta zeharkatzen zuena, hain zuzen ere Pirinioetako bi aldeak konektatzen baitzituen. Bide honen bazterrean eraiki ziren gaur egungo herriekin ere antzekotasunak dituzten hiriak. "Bideak bizkarrezurra ziren, eta honen bi aldetan eraiki ziren Zalduakoa bezalako hiria, gaur egun Auritzek edo Auritzberrik eratu ziren modu berean".
Ostiraleko hitzorduaz gain, datorren larunbatean, uztailaren 27an, bisita gidatuak eginen dituzte Zalduako hiri erromatarrean, hain zuzen ere pasabide garrantzitsu honen bazterrean aurkitzen den aztarnategia. Bisitak euskaraz eta gazteleraz izanen dira eta ez da beharrezkoa aurretiko izen-ematea, aski da Kultur Olara agertzea bisita gidatuaren aurretik. Informazio guztia Arantzadi Zientzia Elkartearen webgunean aurkitu daiteke.
