Nekazaritza eta abeltzaintza industria handiek egiten dituzten isuriek eragindakoa ote den aztertu beharko litzateke Makroetxaldeen Kontrako Plataformak egindako ur neurketen emaitzetan ateratako nitrato kopuru altua. "Nitratoa kutsagarria da ingurumenean eta norbanakoon osasunean ere", salatu du Lorea Flores plataformako kideak parlamentuko lan saioan. Egiten diren isuri horiek ekiditeko kontrol falta sumatzen dute. Nafarroako Gobernuak baliabide mugatuak ditu jarraimendua egiteko, administrazioak berak onartu du hori, eta baita Ebroko Ur Konfederazioak ere. Hortaz, herritarrei egiten diete deia ahal den heinean segimendua egiteko. "Arazoa da neurketak egin eta Ingurumen arlora igortzen ditugula, baina zalantzan jartzen dituztela gure neurketak ez daudelako beraiek nahi duten moduan eginda", azaldu du Floresek.
EH Bilduk, Contigo-Zurekin, Geroa Bai eta PSNk eskatutako lan saioa izan zen ostiralean parlamentuan. Horiek guztiek eskertu zuten plataformak egindako lana. Gainerako alderdiek baina, zalantzan jarri zuten arazoa nekazaritza eta abeltzaintza industria handia denik, eta uste dute, oreka bat lor daitekeela Nafarroan horien eta abeltzain zein nekazari txikien artean. Lorea Floresi Euskalerria Irratian egindako elkarrizketa argazkian klik eginda entzun daiteke.
