Tren sozialaren aldeko aldarria egin zuten larunbatean Altsasun. Sakanako alkateek bat egin dute: guztiek Altsasukoak izan ezik. Manifestazio jendetsu eta koloretsua egin zuten. Milaka herritar atera ziren kalera joaldunekin, trikitilariekin, erraldoiekin eta pertsonaia mitologikoekin batera. "Abiadura Handiko Trenak badu alternatiba. Tren soziala nahi dugu. Egungo trenbide sarea egokitu eta maiztasun gehiago jartzea litzateke egokiena. Gastua txikitu eta ingurua errespetatuz jendeari zerbitzu gehiago ematea da bidea", azaldu du Unai Razkinek, Irurtzungo alkateak.
Herritarren hitza errespetatzeko eskatu diote Nafarroako Gobernuari. Sakandarren gehiengoa AHTaren kontra dagoela adierazi dute. "Abiadura Handiko Trenak ez du zentzurik. Makroproiektu xahutzailea da. Tematuta daude, baina oker dabiltza", esan du Razkinek.
