Nafarroako Auzitegi Nagusiak bigarrenez baliogabetu du Skolae hezkidetza programa, baina "edukian sartu gabe" izan dela adierazi du Maria Solana Geroa Baiko parlamentari eta hezkuntza kontseilari ohiak. "Nafarroako Gobernuak errekurtsoa jarri duela ezagututa lasaiago geratu naiz", adierazi du Solanak Euskalerria Irratian egindako elkarrizketan. "Kutsu erlijisioa eta sinesmen moral jakin batzuk dituztenak ari dira Skolae geldiarazi nahian eta tematuta, baina orain arte erdietsitakoarekin geratzen naiz ni: irakasleei programaren bidez berdintasunerako bidea ereiteko emandako tresnarekin", azaldu du.
"Ez dut ulertzen ahal Nafarroako Auzitegi Nagusiak hartutako jarrera, nahiz eta ez den edukietan sartzen, baina lasaitua hartu dut Hezkuntza Departamentuak errekurritu duela jakitean", esan du Maria Solana hezkuntza kontseilari ohi eta Geroa Baiko parlamentariak Euskalerria Irratian egindako elkarrizketan. 2017an Skolae progrma aurkeztu zenean "eskuinak eta eskuin muturrak" gogor jo zuten haren kontra, eta Iruñeko ikastetxe erlijioso bateko zenbait familiak auzitara jo zuten. Ikastetxe guztietara ez dute eraman ahal izan programa, baina bai Nafarroako 284 ikastetxe publiko eta itunduetara, guztien %87etan, alegia. "Skolae 2017. urtean abian jarri zenetik ikastetxeetan lan egiten duten irakasle eta langile guztiei hezkidetza konpetentzia profesionala eman ahal izan zaie eta horrekin pozik naiz", jakinarazi du Solanak. Aitortzak ere jaso ditu hezkidetza programak, Unescorena kasu. Maria Solanari egindako elkarrizketa osorik entzuten ahal da argazkian klik eginda.
EUSKALERRIA IRRATIAzale hori:
FM 98.3ko zein euskalerriairratia.eus webguneko edukiak musu truk entzun, irakur eta ikus ditzakezu.
Zuretzako eskari bat dugu: posible baduzu, lagun gaitzazu gero eta eduki gehiago eta hobeak sortzen, Iruñerriko euskaldun ororen eskura jartzeko.
Izan ere, zenbat eta komunitate handiagoa, orduan eta proiektu komunikatibo eraginkorragoa.
Bazkidetu zaitez!