Zientzia fikzioaren etiketa jartzeak mugatuko luke Yurre Ugarte idazleak eta Julen Ribas ilustratzaileak sortutako Iris XXII komikia. Genero horretatik edaten duela argi dago, Ugartek azpimarratu duen bezala, etorkizuneko egoera bat proposatzen duelako. Baina errealista ere bada, izan ere, gure egunean ezagutzen ditugun egoeretatik ere abiatzen da :"Hare gehiago egoera horiek eragin duten hondamenditik eraikitzen da". Sortu duten Numun gizarteaz, lengoaiaren sorkuntzaz, fikzioak beharrezkoa duen sinesgarritasunaz eta zientzia fikzioak irekitzen dituen ateetaz hitz egin dugu egileekin.
