Inauterien azken eguna, Pazko egunerako 40 egunera. Momotxorroak aterako dira gaur Altsasun kalera; ardi larruak bizkarrean eta adarrak buruan jantzirik, aurpegia estalirik eta odolez zikindutako amantalarekin, sardearekin, lepoko zintzarriarekin eta garraxi eginez, kalez kale biltzen dira, izua eraginez. Altsasuko inauteriak 1980ko hamarkadan berreskuratu ziren. "Akerra, sorgiñak, Maskarita edo Juantranposo pertsonaiak ere aterako dira kalera. Izua sortuko dute herrian, akelarrea eta kalejira eginen dituzte", esan du Euskalerria Irratian Naiara Urkijo Altsasuko inauterien batzordeko kideak.
Iluntzean, 18:45ean eginen dute euren erritua Momotxorroek. Kalejiran aterako dira 19:00etan eta 19:30ean plazan izanen dira. Altsasuko inauterien inguruan hitz egin du Naiara Urkijok Euskalerria Irratian. Elkarrizketa entzun daiteke argazkian klik eginda.
