Lesakako udal pilotalekuan jokatu zen atzo hirugarren eta azken finalaurrekoa, frontoia lepo bete zuten 500 bertsozaleren aitzinean. Alaitz Rekondo aritu zen gai jartzaile, eta hasieratik Illarregi eta Lazkoz koska bat gorago aritu ziren.
Azkenean, Joanes Illarregik 525,5 puntu eskuratu zituen. Eta zuzenean sailkatu zen finalera. Eneko Lazkozek, 521 punturekin, eta Josu Sanjurjok, 492,5ekin ere lortu zuten Anaitasunerako txartela. Haien atzetik geratu ziren Eki Mateorena, Mikel Lasarte eta Beñat Astiz.
Anaitasunako finalari dagokionez, argazkia zertxobait aldatu da; izan ere, Karasatorre eta Robles lehendabizikoz sailkatu dira final batera. Eta, bestalde, hogei urte baino gehiagotan lehendabizikoz, bi emakume batera ariko dira Nafarroako Txapelketako Finalean: Alkaiza eta Robles.
Anaitasunerako 3.000 sarrerak dagoeneko salgai dira bertsosarrerak.eus atarian.