ELA sindikatuak elkarretaratzea egin du Nafarroako Jauregiaren aurrean aurreko astean lan-istripuan hildako azken biktima gogoan. 22 urteko behargina Burlatako Automoviles Torregrosa enpresan izan zuen istripua maiatzaren 12an eta handik sei egunera zendu zen ospitalean.
Nafarroan gertatzen den eta heriotza eragiten duen laugarren lan-istripua izan da. Agintariek "enpresarien interesen aurka egin dezakeen edozen neurri ekidin" eta lan ikuskaritza behar bezala aplikatzen ez dutela salatu dute gaurkoan.
Era berean eskatu dute "2018an Nafarroako Parlamentuak onartutako" araudia martxan jar dezan Nafarroako Gobernuak eta hasi dadin lan-istripuen prebentzioaren kudeaketa bereganatzen, lan-ikuskaritza indartuz eta istripuak prebenituz.
Azkenik, elkartasuna adierazi diete Burlatako biktimaren senide eta lankideei.
