Nafarroan 1.106 langabe gutxiago zenbatu dituzte apirilean, aurreko hilabetearen aldean, eta Foru Erkidegoan 30.844 langabe daude, Lan eta Gizarte Ekonomia Ministerioak ostegun honetan argitaratutako datuen arabera. Azken urtean, 2.582 langabe gutxiago izan dira Nafarroan, % 7,72. Datuek talka zuzena egiten dute Biztanleria Aktiboaren Inkestak emandakoekin, nahiz eta hauek lehen hiruhilekoari erreparatu.
Langabeziak behera egin du aurreko hilean Foru Erkidegoko sektore guztietan. Zehazki, 730 pertsona zerbitzuetan, 203 industrian, 99 nekazaritzan, 55 aurreko enplegurik gabekoetan eta 19 eraikuntzan.
Langabea, emakume
Foru Erkidegoko 30.844 langabeetatik, 12.057 gizonak dira eta 18.787 emakumeak; 2.709 25 urtetik beherakoak (1.402 gizon eta 1.307 emakume); eta gainerakoak, 28.135 adin horretatik gorakoak (10.665 gizon eta 17.480 emakume).
Sektoreka, gehienak zerbitzuen sektorekoak dira (20.992 langabetu), eta atzetik datoz industria (3.730), nekazaritza (1.446) eta eraikuntza (1.352). Aurreko Enplegurik Gabekoen taldean 3.324 langabe daude.
Kontratazioari dagokionez, Nafarroan 20.366 kontratu egin ziren apirilean, aurreko hilean baino 4.416 gutxiago (%-17,82). 20.366 kontratuetatik, 5.183 mugagabeak dira eta 15.183 aldi baterakoak.