Doña Blanca de Navarra eskola publikoan euskarazko D ereduko lerroa irekitzea eskatzeko instantziak aurkeztu zituzten azaroan, baina gobernuak ez die jaramonik egin. Legearen arabera zortzi haur da gutxienekoa lerroa zabaltzeko, eta hemeretzi dira Lerinen. “Gutxiengo eskari kopurua aise gainditu arren, aurre-matrikulazio epean ez zaigu eman Doña Blanca de Navarran D eredua hautatu nahi dugula adierazteko aukerarik”, azaldu zuten atzo familiek. Elkarretaratzea egin zuten, Behatokiak eta Sortzen elkartearekin batera.
Sortzen guraso elkarteak Eskola Kontseiluan eskatutako azalpenen bidez jakin izan dute, gainera, datorren ikasturterako Hezkuntza Departamentuak ez duela asmorik D eredua zabaltzeko. Argudioa espazio falta dela adierazi zitzaien, beraz udalak hutsik dituen ikastetxe ondoko eraikin eta lokalak Hezkuntza Departamentuaren esku jar ditzan eskatuko dute.
