Euskarazko lerroa nahi dute Leringo hainbat gurasok eta eragilek. Hemezortzi ikaslek dira denera, eta epearen barruan egin diote Leringo Blanca de Navarra ikastetxe publikoan D eredua ezartzeko eskaera Hezkuntza Departamentuari. Hala ere, gobernuak ez du eskola mapan gehitu eskatutakoa.
Arrazoiak eskatuko dizkio departamentuari Sortzenek. “Egia da Larragako eskaera baino beranduago egin zela eskaera, baina epearen barruan. Larragan lortu da D eredua ezartzea, eta Lerinen ez”, azaldu du elkarteko Marta Diazek.
Aurreko legegintzaldiko Nafarroako Gobernuak, jardunean, onartu zuen Ikastetxe Publikoen Sarea berrantolatzen duen Foru Dekretua. Orduan ezarritako antolamendu-egitura horren bitartez jakin daiteke, bizilekuaren kokapenaren arabera, zer ikastetxe publiko dagozkion bakoitzari, hezkuntza-etapa eta aukeratutako hizkuntza-eredua kontuan hartuta. Eskola Kontseiluan ari dira egun mapa lantzen, eta euskararen normalizazioa geldiarazteko beste tresna bat dela salatu du Diazek.
Leringo familien eskaera errefusatzeko arrazoiak galdegingo dizkio elkarteak Hezkuntza Departamentuari, eta Leringo familien eskubideen alde eginen duela iragarri dute.