Laura Aznal izango da EH Bilduren Nafarroako Parlamenturako zerrendaburua. Alderdi subiranistaren mahai politikoak egungo parlamentaria proposatu du 2023ko maiatzeko hauteskundeetan zerrendaren buru izateko. Bestalde, Joseba Asiron EH Bilduk Iruñeko Udalean duen bozeramaileak, 2015etik 2019ra bitartean alkate izan zenak, hautagai gisa errepikatuko du hiriburuan.
Barne prozesurako hautagaitzak aurkezteko epea igande honetan amaituko da, baina ez da hautagai alternatiborik espero.
Ilusioz eta kompromisoz, EH Bilduren Nafarroako zerrendaburua izateko hautagai gisa aurkezteko erronka onartzea erabaki dut, EH Bilduren oinarri sozialak hala erabakiko balu.
— Laura Aznal (@Laura_Aznal) May 6, 2022
Eskerrik asko konfidantzagatik! pic.twitter.com/nFOy0BoGOA
Anzalek Bakartxo Ruiz ordezkatuko du. Aste honetan baieztatu zuen ez duela Parlamenturako zerrendan errepikatuko. Hautagai-zerrendaren buru izateko hautagaiak aurkezteko epea amaituta, bestelako proposamenik ez badago, alderdiaren oinarriek, bilkide-izena hartzen dutenek, izendapena berretsiko dute maiatzean. 26tik 28ra eginen da bozketa.
Zerrendak egiteko barne-prozesua azaroan osatuko da. Zerrendako kide izan nahi duten bilkideek aurkeztu ahal izango dute hautagaitza, eta ondoren zerrenden batzordeak prestatuko du.
