Iruñean, zuhaitz bakar batek du izen propioa: San Jose zuhaitzak, gaztelaniaz el arbolico de San Jose deitzen duten horrek, hain zuzen ere. Takonera parkean dago, Tres Reyes hotelaren ondoko kioskotik hurbil. Gaztainondo bat da, itxuraz, ingurukoak bezalakoa, baina badu berezitasun bat: inguruko zuhaitzok baino hilabete lehenago ateratzen ditu hostoak.
Tradizioaren arabera, San Jose egunean ateratzen ditu hostoak, martxoaren 19arekin. Hortik datorkio izena eta ospea, XX. mendean iruindarrei udaberriaren etorrera iragarri izan dien arbolari. Aurten, ordea, hilabete lehenago egin du, otsailaren 19rako hain zuzen ere, Zuhaitz Zaharren Elkarteko Mikel Belaskok twitterren azaldu eta argazkiz dokumentatu duen bezala.
Belaskorekin zuhaitz berezi honetaz mintzatu gara Metropoli Forala saioko lehen deian.
San Jose egunerako ateratzen zituen hostoak Iruñeko #arbolicodesanjosé gaztainondoak. Iruñeko zuhaitzik goiztiarra zen eta udaberria iragartzen zuen XX. mendeko iruindarrei. Aurten, 2022ko otsailaren 19an, hostoak agerian dauzka. #fenologia pic.twitter.com/ElioToqhzV
— MikelBelaskoEuskaraz (@mbelaskoEU) February 19, 2022
