Asteburuan Laudioko Aiaraldea Ekintzen Faktorian aurkeztu dute euskararen aldeko lasterketa handiari buruzko lana. Hain zuzen ere bertan hasiko da 22. Korrika.
Txakur Gorria sormen taldeak ekoitzi eta osatu du ‘Uhinak’ korrikaren historian murgiltzeaz harago, Euskal Herriaren hizkuntza errealitatea islatu nahi duen dokumentala.
Bi parte ditu. Batetik, zazpi lurraldeetako herrietako euskaldunek euskarari buruz hitz-jolasean ariko dira. Hauek dira ‘Uhinak’ lanean hitz egiten duten bederatzi lagunak: Suhar Anzorandia Peritz (Barakaldo), Etxahun Anakabe Tapia (Barakaldo), Haira Aizpurua Ibargarai (Sara), Itxaso Balza de Vallejo Carbajo (Maeztu), Monica Fernandez Cuesta (Zintroniko), Izaskun Igoa Jaimerena (Ziga), Joxe Landa Odriozola (Itziar), Myryam Quintana Urrea (Kanpezu), eta Marie-Agnès Gorostiague Salaberri (Ainhize- Monjolose).
Bestetik, bertako hizkuntzaren egoerari buruzko azterketa sakonagoa egiten du lanak artxiboko irudiek lagunduta.
22. Korrika apirila hasieran abiatu bitarte, ‘Uhinak’ lanak bere bidea egingo du eta Iruñerrira ere helduko da. Data zehatzik ez du iragarri Korrikaren antolakuntzak baina laster informazioa zabalduko dute korrika.eus atarian. Gainera interneten ere eskuragarri jarriko dute ‘Uhinak’.
