Maria Solanaren aburuz, “onartezina da inolako daturik gabe halako akusazioak egitea”. “Oso larria da. Esan dituen basakeria hauen aurrean, atera dira datu asko, eta ikusten ari gara ez dela egia. Baina egia balitz ere, zer? Horrek zer esan nahiko luke? Bestelako irakurketarik egiteko eta bestelako proposamenik egiteko gauza ez bada, ez da Iruñeak behar eta merezi duen alkatea”, salatu du. Geroa Baiko parlamentariaren arabera, “datu okerrak darabiltza Maiak, eta hoberena litzateke hauteskundeetan ere datu okerrak lortzea”.
Bakartxo Ruizen irudikoz, “erabateko arduragabea izaten ari da alkatea”. ”Eskuin muturrera jotzen ari da eta eskuin muturraren diskurtsoa elikatzen ari da. Halakorik balego ere, halako ardura politikoa duen pertsona batengandik espero beharko genuke zioetara jotzea, konponbideak jartzea, ikustea udaletik zein ekarpen egin diezaiokeen elkarbizitzari eta garatzen ari diren plan eta estrategiei, adibidez, Xenofobiaren Aurkako Plan onartu berriari”, gaineratu du. Gauzak horrela, Ruizen iritziz, “iruindarrok ez dugu halako alkaterik merezi”.
