Nafarroak % 10 murriztu du energiaren kontsumoa 2020an, urtebete lehenago erregistratutako datuekin alderatuta. Baina azken hogei urteetan gora egin du urtetik urtera kontsumoa. Pandemiak baldintzatu du aldaketa, kontseilariak azaldu duenez. Hala ere, garapenean bestelako aldagaiak ere kontuan hartu behar direla ohartarazi du. Duela hogei urte baino herritar gehiago ditu Nafarroak, eta kontsumoa per capita neurtuz gero, beherazkoa da joera. Hori da bidea gobernuko ordezkariaren ustez, efizientzia energetikoa baitu erronka nagusienetakoa Nafarroak, haren aburuz.
Balantzeko daturik azpimarragarrienetako bat da Nafarroan energia berriztagarriaren presentzia handitu egin dela. Egungo sistema energetikoa "zikina, ez-eraginkorra eta garestia" dela adierazi du, eta trantsizio energetikoan Nafarroa bide onetik doan arren, egitekoak asko direla. Elektrifikazioa eta auto-kontsumoa indartzea dira horietako bi.
Iturriei buruz galdetuta, kontseilariak aitortu du haize sorgailuen eta eguzki plaken parkeak direla bultzatuko dituztenak. Egun Nafarroan enpresek proiektatu diren guztiak ez direla behar nabarmendu du ere, eta gehiago direla herritarren babesa dutenak, ez dutenak baino.
