Erabakia hartu zutenetik lau egun igaro diren honetan, Agirrezabalek ez du damurik. Argi dauka ezin zutela beste erabakirik hartu, erakundeen jarrera ikusita.
Jaialdia bertan behera uztea erabaki gogorra izan da antolatzaileentzat. Hura antolatzeko prozesua ere gogorragoa izan baita beste zenbait urtetan baino. Pandemiaren poderioz ezinen zutela egin uste zuten. Duela bi hilabete kutsatze kopuruen datuak eta agintarien mezuak ikusita, aurrera egitea erabaki zuten. Gogotik egin zuten lan. Inbertsioak egin zituzten. Eta orain, inbertsio horiek galera bihurtuko dira.
Gauzak horrela, jada lanean hasi dira galerei buelta eman eta horien gainetik etekinak ateratzeko, elkartasunera bideratu ahal izateko. Bi bide aurreikusi dituzte: arropa salmenta eta uztaileko jaialdia.
Bitartean, abenduko jaialdirako sarreren dirua bueltatuko dute, datorren ostegunetik aurrera.
