Larunbat goizean jazo zen ezbeharra. Alberto Lopez de Lacalle preso gasteiztarraren bikotekideak eta lagun batek, antsoaindarrak biak, auto istripua izan zuten Villlabonako (385 km) espetxerako bidean. Euskal presoen senide eta lagunek sufritzen duten urrunketa politikaren adibide da Mundiñanoren iritziz, zorionez "sustoa" baino izan ez dena. Urrunketak 16 hildako eragin ditu indarrean izan denetik.
Sareren aldarriak Europatik babesa jaso du albistea zabaldu zen egun berean. Europako Kontseiluko Torturaren Prebentziorako Batzordeak txosten bat argitaratu du, eta, besteak beste, Espainiari eskatu dio presoak "beren senideetatik gertuago" dauden espetxeetara eramateko. "Enegarren ohartarazpena" dela dio Mundiñanok, eta "salbuespenak" hor jarraitzen duela ekarri du gogora.
Nafarroako 29 euskal preso daude, hamar baino gutxiago Iruñean. Urrunketa politikaren amaiera eskatzeko elkarretaratzera deitu ditu herritarrak Sare herritarrak. Ostegunean, 19:30ean eginen dute Antsoaingo Kaputxinosen.