Astelehenero bezala, Oneka, Nafarroako Pentsionistak Martxan eta Sasoia elkarteek atzo protesta egin zuten pentsio duinen aldeko aldarria kalera ateraz. Oraingoan, baina, aste honetan izanen den hitzordu baten berri eman dute. Manifestazioa eginen dute larunbatean. Sasoia elkarteko Patxi Urrutiaren iritziz, ezin une aproposagoa da kalera ateratzeko.
Espainiako Gobernuak pentsio sistemaren erreformaren bigarren zatia adostu behar du aste honetan. Proposamenak pentsioen murrizketa ekarriko duela salatu du Urrutiak, eta CCOO eta UGT sindikatuek horrekin bat egitea deitoratu du.
Nafarroan aurrekontuetarako Nafarroako Gobernuaren eta Eh Bilduren arteko akordioak pentsioen gaineko konpentsazio bat eraginen du datorren urtean. Pentsiodunen sarrera minimoak 800 eurora igoko dituzte. Arazoari irtenbidea emateko "aurrera urratsa" da Urrutiaren iritziz, eta hala baikorki hartu du erabakia.
Edonola ere, aldaketa oinarrizkoagoa izan behar duela uste dute pentsidunek. Hori eskatzeko aterako dira kalera larunbatean eta babes zabala izanen du protestak. Euskal Herrikoa da deialdia; eta, hemen, ELA, LAB, ESK, Steilas, CGT, EHNE, Bilgune Feminista, Ernai, Nafarroako Osasun Plataformarekin, SOS Arrazakeria eta AHT Gelditu eragileek bat egin dute deialdiarekin.
