Aurrerapen globalak eta tokikoak nahikoak ez direla uste du EH Bilduk, horregatik zenbait kide Glasgowen egiten ari diren COP26 klimaren goi-bileran daude. Horietako bat da Nafarroako parlamentari Laura Aznal. "Hitzordu garrantzitsua" dela uste du, "larrialdi klimatikoaren aurrean konpromiso gehiago eta handiagoak hartu ezean", aldaketa klimatikoa traumatiko eta mingarria izan delako, taldearen aburuz.
Egunotan, goi bileran, akordio garrantzitsuak hartzen ari direla uste du, eta zenbait herrialde kanpoan geratu izana eta hitzarmenak betetzea borondatezkoa izatea deitoratu du.
Nafarroan aldaketa klimatikoaren eta trantsizio energetikoaren lege proposamena lantzen ari dira egun parlamentuan. 527 ekarpen izan ditu testuak, eta ganberan 50 eragiletik gora hartu dute parte. Ekarpen horiek entzunda, emendakinak prestatzen ari da EH Bildu. "Asko", Aznalek zehaztu duenez. Glasgowen hartzen diren konpromisoak ere Nafarroara ekarriko dituela ohartarazi du. Datorren osoko-bilkuran gaiaren inguruko galdera eginen dio taldeak gobernuari.
Goi bilerako hainbat lan-mahaietan eta bertan deitutako mobilizazio sozialetan parte hartzen ari da EH Bildu.
