Bi urte zailen ostean, Lizarrako ikastolak ospatu du bere Nafarroa Oineza. Koronabirusak ez ditu gauzak erraz jarri eta iazko festa bertan behera utzi eta gero, aurtengoan egun batetik bestera aldatu zituen ospakizunak egiteko baldintzak. Festa txikia antolatuta zuten ikastolako kideek, ohiko ospakizun erraldoia montatzeko betarik gabe. Hala ere, Lizarran giroa paregabea izan zen eta bertaratu ziren ehunka euskaltzaleek, antolakuntzak prestatu zituen jaki, edari eta jantzi guztiak agortu zituzten.
Ikastolan haurrek izan zuten beren gunea, Ene Kantak-en kontzertu jendetsuarekin eta ikastolako erraldoien dantzekin; Lizarrako zezen plazan gazteak elkartu ziren Zaunka eta Raimundo el Canasteroren doinuekin dantzan...giro euskalduna Lizarra osoan barreiatu zen, kalezkale ibili ziren txaranga eta fanfarreekin.
Joseba Tristan, Lizarrako ikastolako zuzendaria pozik azaldu da gaur goizean Euskalerria Irratian. "Pozik gaude, zikloa behingoz itxi dugulako eta goizean eguraldiak gauzak zail jarri bazizkigun, azkenean egun paregabea izan genuelako" azaldu du Tristanek, "Hala ere, iakstolak oraindik laguntza behar du, haur hezkutnzako eraikina moldatu, ikastola bera zaharberritu eta Lizarraldean euskarari bultzada ematen jarraitzeko". Oraindik ere, Nafarroaoinez.eus diru ekarpenak egiteko aukera badago.