Iñaki Abad gaur geratuko da erabat aske

Altsasuko auzian ezarritako hiru urte eta erdiko zigorra osorik beteta, eskumuturrekoa eta etxeko aparatua kendu eta gaur izenpetuko du askatasuna. Altsasuko auzian zigortutako zortzi gazteetatik sei, oraindik hirugarren graduan dira, eta zigorrak osorik betetzeko itxaron beharko dute. Horietako bat da Adur Ramirez de Alda, haren aitarekin Antxon Ramirezekin hitz egin dugu Metropoli Foralean. 

Zortzi gazteetatik kalean aske izanen den bigarrena da Iñaki Abad. Arratsaldean ospatuko dute Altsasuko gazte eta gurasoek, gaurkoa ospatzekoa baita, Antxon Ramirezen iritziz. 

Azken bi urteotan hirugarren graduan izan da Abad, etxean, baina baldintzapean. Orain aske izanen da, baina aurrekarien itzalarekin. Hori guztientzat hala izanen dela susmoa dute, eta horrek kezkatu egiten ditu gurasoak. 

Bost urte eginen ditu aurten auziak. Espainiako justizia sistemaren urrats guztiak agortuta,  Estrasburgoren zain daude. Itxaropena ez dute galdu, baina zerbait lortzea zaila izanen dela ohartarazi du Ramirezek, Euskalerria Irratian.