Castejongo Maiatzaren Bia ikastetxeak PAI programatik ateratzeko eskaera egin dio Hezkuntza Departamentuari. Haren erantzuna izan da jada martxan dauden ikasturteetan ikasleei ingelesezko PAI programan ikasten segitzeko aukera bermatu behar diela. Hori bermatzeko planik egin gabe, ez dio PAItik ateratzeko baimenik emanen.
Departamentuak bi asteko epea eman dio plangintza hori prestatzeko ikastetxeko zuzendaritzari.
Zuzendaritzak agiri bat bidali dio departamentuari, galdetuz ea kurtso hitzarekin zer esan nahi duten. Izan ere, uler daiteke kurtso honetan ikasten segitzeko aukeraz soilik ari direla, eta ez ikastetxetik atera arteko beste ikasturte guztietan.
Departamentua bigarren aukeraz ariko balitz, zuzendaritzak dio ez lukeela zentzurik ikasleei kalte egiten dien programa batekin segitzeak.
Castejongo ikastetxe publikoak behar berezietako ikasle asko ditu, erdiak baino gehiago. Horietako asko migratzaileen seme-alabak dira. Haientzako gaztelania jada bigarren hizkuntza da; ingelesa hirugarrena. Hortaz, ingelesezko murgiltze eredua kalte nabarmena egiten ari zaiela dio Maiatzaren Biko ikastetxeko zuzendaritzak.
Castejongo ikastetxea PAItik irtetea eskatu duen lehen ikastetxea da, Maria Solanara Hezkuntza kontseilari zelarik ate hori zabaldu zenetik.
