Neurri murriztaileetan apustu etxeekin egiten den salbuespena berrikusteko eskatu du EH Bilduk

Euskalerria Irratia 2021ko urt. 27a, 10:03

EH Bilduk mozio bat erregistratu du Nafarroako Parlamentuan, gobernuari eskatzeko, batetik, neurri murriztaileen foru aginduan zehaztu dezala lokalen barrualdeak ezingo direla erabili apustu makinak edo txanpon makinak erabiltzeko; eta, bestetik, apustu aretoetan aplikatzen diren neurriak berrikus ditzala. 

EH Bilduk neurri murriztaileak berrikusteko eskatu du, apustu lokalei dagokienean; izan ere, nahiz eta egungo araudiak ez duen aipatzen ostalaritza barruan joko makinak erabiltzeko aukera, Herrizaingo Zuzendaritza Nagusiaren mendeko Joko eta Ikuskizun Publikoaren Atalak interpretatu du jarduera horiek egin daitezkeela, ez daudelako debekatuta.

Ohar batean, EJ Bilduk bat egin du apustu etxeen aurkako plataformekin eta Aralar ludopatiaren laguntzarako eta prebentziorako elkartearekin. Talde horiek esparru horretan araudiak duen permisibitatea gaitzetsi dute eta kezkatuta agertu dira, bai Covid-19aren kutsatzeak prebenitzeari dagokionez, bai jokoarekiko mendekotasuna eta ludopatia prebenitzeari dagokionez.

EH Bilduren talde parlamentarioak mozio bat erregistratu du Nafarroako Parlamentuan, eta, horren bidez, Foru Gobernuari eskatu dio "2/2021 Foru Agindua aldatzeko eta 3.1 puntuan azaltzeko lokalen barrualdeak ezingo direla erabili apustu makinak edo txanpon makinak erabiltzeko".

Era berean, apustu lokalen, bingoen eta apustu aretoen barrualdean aplikatzen diren araudia eta neurri murriztaileak berrikusteko ere eskatzen du, prebentzio neurri gisa, eta horiek benetan betetzen direla bermatzeko kontrol neurriak areagotzea.

EUSKALERRIA IRRATIAzale hori:

FM 98.3ko zein euskalerriairratia.eus webguneko edukiak musu truk entzun, irakur eta ikus ditzakezu.

Zuretzako eskari bat dugu: posible baduzu, lagun gaitzazu gero eta eduki gehiago eta hobeak sortzen, Iruñerriko euskaldun ororen eskura jartzeko.

Izan ere, zenbat eta komunitate handiagoa, orduan eta proiektu komunikatibo eraginkorragoa.


Bazkidetu zaitez!