Nafarroako Gobernuko Osasun Departamentuak atzo iragarri zuenez, beste astebetez mantenduko du Azkoiengo mugikortasun murrizketa, eta bihartik aurrera Faltzesen eta Funesen kenduko du, bi herri horien intzidentziaren beherakadari esker.
Nolanahi ere, Osasun Departamentuak edukiera eta ordutegi mugen ezohiko neurriei eutsiko die, bilakaera epidemiologiko egokia sendotzeko.
Ohar baten bidez, foru gobernuak azaldu du eremuaren bilakaera epidemiologikoa "aldekoa" dela, baina Azkoiengo kasuan maila altuetan jarraitzen duela, eta, beraz, udalerri honetarako bere horretan mantenduko direla irailaren 23an onartutako eta astebete geroago berritutako murrizketak; gaur arte egongo dira indarrean eta bihar berriro luzatuko dira.
Neurri horiek eremu publiko eta pribatuetako ordutegiei, edukierei eta pertsona taldeei eragiten diete, eta mugak ezartzen dizkiete udalerriko sarrerei eta irteerei, ezinbesteko joan-etorrietarako erreserbatuta baitaude.
