"Ezberdinen arteko elkarrizketa" ezinbestekoa dela iritzi dio EH Bilduko Bakartxo Ruizek. PSNri zuzendu zaio: "PSNk benetan borondatea badu, eskuinari alternatiba eskaintzeko hitz egin beharko du. Eskuina geldiarazteko ezinbestekoa da EH Bildurekin hitz egitea".
Gaur abiatu ditu gobernua osatzeko bilerak PSNk. Geroa Bai, Ahal Dugu eta Ezkerrarekin bilduko da Maria Txibite. EH Bildurekin esertzeari uko egin dio PSNk behin baino gehiagotan. Baita gaur ere. "Onartezina" dela uste du Ruizek: "Nafarroako erabakiak Nafarroan hartu behar dira, ez Ferrazen edo Madrilen (...). PSN antzerkiak egiten ibiltzeak Madrilen mende egotea dakar". Elkartzeko dei egin dio Ruizek Txibiteri.
Udalak osatzeko alderdiak ezarri dituen irizpide berdinak jarraituko ditu Nafarroako Gobernua osatzeko negoziazioetan. Aldaketari jarraipena emateko eta eskuinari atea ixteko konpromisoa agertu du zerrendaburuak.
