Hainbat udal, Nafarroako Parlamentuko mahaia eta negoziazioak izan dituzte hizpide PSNk eta Geroa Baik gobernua osatzeko lehengo bileran. Uxue Barkos buru izanen duen Geroa Bairen ordezakeritza batekin batzartu da PSNko ordezkaritza, Nafarroako Parlamentuan, 13:00etan.
Negoziazioa "pozik eta ilusioz" egingo dutela aipatu du PSNko Ramon Alzorrizek bilera amaituta. "23 parlamentariren gehiengoa" du helburu PSNk. Lortuz gero, Maria Txibite inbestidurara aurkeztuko da. Bere ustez, gehiengo osorik ez izatea "garai berri baten isla da" eta modu horretan legealdian akordioak bilatuko lituzkete. Marra gorri bi marraztu ditu: "Ez diogu babesa emango Navarra Sumari eta ez dugu elkarrizketarik egingo EH Bildurekin".
EH Bilduren abstentzioa beharko lukeela gogorarazi diote Alzorrizi. Beste aukera bat jarri du mahai gainean: "Edo maiz PSNri eskatu zaion erantzukizuna eskatu beharko zaie beste batzuri"
Geroa Baik "egonkortasuna" eskatu dio Maria Txibiteri, hala adierazi du Geroa Baiko Unai Hualdek prentsaurrean. "Garrantzia ematen diogu egonkortasuna emango duen gehiengoa lortzeari. Argitu beharko digute hori nola lortu nahi duten". Haren ustez, "talde guztiekin egoera normalizatu batean" hitz egin behar da. Geroa Baik galdetu die "ea benetako borondatea" dagoen. Zalantzak dituztela onartu du Hualdek.
"Ferrazekin sintonian"
Alzorrizen arabera, Jose Luis Abalosek ez du negoziazioa hastearen aurka egin. Jose Luis Abalos PSOEko Antolamendu idazkaria mintzatu zen atzo Maria Txibitek eginen duen bilera errondaz: "Maria Txibite alderdikidea ez da ari zuzendaritzari erronka botatzen". "Arazoa ez da hainbeste Bilduren abstentzioa, baizik eta horrek nola eragingo liokeen gobernuaren egonkortasuna bermatzeko orduan". Ferrazekin sintonia berean daudela dio Alzorrizek. 2007ko abuztuko egoera ez dela errepikatuko adierazi du.
