Maria Solana: "Madrilek baimena ematea falta da 113 milioi euroko inbertsioak egin ahal izateko"

Euskalerria Irratia 2018ko urr. 3a, 13:18
Maria Solana bozeramaleak agerraldia eskaini du Gobernu bileraren ondotik Isabel Elizalde kontseilariarekin batera.

PSNk esan ondoren Nafarroako Gobernuak ez dituela gauzak ongi egin eta jasangarria den inbertsio plana aldatu beharko duela ohartarazita, Gobernuko bozeramaleak esan du halakorik ez diotela eskatu Madrildik. 

"Nafarroarekin Espainiako Ogasun ministerioa ez da harremanetan jarri. Inork ez digu eskatu aurkeztutako inbertsio jasangarrietarako plana zuzentzeko", hitz horiekin argitu du Maria Solana Nafarroako Gobernuko bozeramaleak 113 milioi euroekin gertatzen ari dena. "Maria Txibite gaia nahasi nahian dabilela ematen du. Dagokigun lana egin dugu eta orain pilota Madrilen teilatuan dago. Hark erabaki beharko du Nafarroako proposatutako inbertsio plana baimentzen duen ala ez", gaineratu du. 

Laukoak nafarren alde egin dezala eskatu dio PSNri

Osoko bilkuran ostegunean Gobernua babesten duten lau alderdiek aurrera aterako dute 113 milioi euroko inbertsio plana jasotzen duen legea. Geroa Baik, EH Bilduk, Podemos-Ahal Duguke eta Izquierda-Ezkerrak erregistratu zuten duela bi aste lege proposamen hori, eta irakurraldi bakarrean onartuko dute: "PSNri dei egiten diogu, urtarrilean Maria Txibitek berak esan bezala, ausardiaz jokatzera eta Nafarroarako onak izanen liratekeen inbertsioak babestera", esan dute. 

EUSKALERRIA IRRATIAzale hori:

FM 98.3ko zein euskalerriairratia.eus webguneko edukiak musu truk entzun, irakur eta ikus ditzakezu.

Zuretzako eskari bat dugu: posible baduzu, lagun gaitzazu gero eta eduki gehiago eta hobeak sortzen, Iruñerriko euskaldun ororen eskura jartzeko.

Izan ere, zenbat eta komunitate handiagoa, orduan eta proiektu komunikatibo eraginkorragoa.


Bazkidetu zaitez!