"Ez dago eskaririk gisa horretako instalazio batentzat; honek sortuko luke eskaria eta oso problematikoa izan daiteke auzoarentzat, turismo sostengarria nahi badugu. Honek ez dio mesederik eginen auzoari", esan du Alde Zaharrean Bizi elkarteko Javierrek, Ahotsa.info-k egindako bideoan.
"Nahikoa arazo badugu astebururo 300 pertsona ezkontza aurreko agur-ekintzetan egonda", gaineratu du. "Ezkerrekoa den udal batek ez luke gisa horretako multinazional baten lokala onartu beharko. Negozioa egitera datoz; merkantilizazio prozesu bat da".
Heldu den astean, hilaren 26an, ostegunarekin, elkarretaratzera deitu dute, Unzuko hotelari ez, Alde Zaharra ez dago salgai lelopean.
Zein da proiektua?
2007an itxi zuten Unzu eta ordutik ez ditu pertsianak igo. Orain, Vive Unzu izeneko proiektuarekin berriz irekiko du eraikin historikoa Serypro sustatzaileak: hamar denda zabalduko dituzte, bai eta 277 plaza izanen dituen hotel bat ere, eta etxebizitza hainbat.
6.621 metro koadro dauzka lokalak eta egitura "ahalik eta gehien" mantentzen ahaleginduko dira sustatzaileak, adierazi dutenez; gainera, aurrekaldeak babestuta daude, historikoak dira-eta.
Momentuz, obra lizentzia eskatu du Serypro sustatzaileak.
