Emakumeen Kontrako Indarkeriaren Iruñeko Auzitegiak espetxera bidali zuen atzo Blanca Marquesen bikotekidea, Javier Nierto. Astelehenean atxilotu zuten, Burlatan, emakumea hil eta gorpua Ultzama ibaira bota zuela aitortu ondoren. Epaileak aitortzari zilegitasuna eman dio.
Atzo eguerdian deklaratu zuen gizonak, eta bezperan Espainiako Poliziari esandakoa berretsi zuen epailearen aurrean: "eztabaida gogor baten ostean", bikotekidea hil arte ito zuela. Atxilotuak aitortu zuenez, erasoa larunbat arratsaldean gertatu zen, baina igande goizera arte ez zuen hilotza ibaira bota.
48 urte zituen indarkeria matxistaren aurtengo bigarren biktimak, Blanca Marquesek. Atzo eguerdian, Nafarroako larrialdi zerbitzuek berriz abiatu zuten haren gorpua aurkitzeko prozedura, baina Arga eta Ultzama ibaien emari handiak eta ur nahasien gardentasunik ezak asko zaildu zituzten lanak.
Kalean salaketa ugari
Nafarroako erakunde publikoek eta eragile sozial, politiko nahiz sindikalek deituta, hainbat mobilizazio izan ziren atzo Iruñean eta Burlatan, hilketa salatzeko. Blanca Marquesen lankideek eguerdian egin zuten elkarretaratzea, Nafarroako Gobernuko Eskubide Sozialen Lehendakariordetzaren egoitzan.
Iluntzean, Burlatako herritarrek protesta isila egin zuten udaletxearen aurrean.
Gaur ere hainbat mobilizazio izango dira: 19:00etan, gobernuak bilkura eginen du Nafarroako Jauregiaren aurrean. Euskal Herriko Emakumeen Mundu Martxak ere protesta eginen du, besteak beste, Iruñeko Udaletxe plazan.
