“Ez dut ezkutatzeko deus”, hitz horiekin ekin dio Laura Perezek agerraldiari. Eskuartean, frantseseko irakasle izateko Artikako kontzejuak egindako probaren espediente guztia. Proba egiteko lehen deialditik, frantseseko irakasle izateko puntu gehien jaso zituela ziurtatzen duen azken papereraino. "Iraina" iruditu zaio Podemos-Ahal duguko Parlamenturako zerrendaburuari Nafarroako Gobernuko bozeramaile Juan Luis Sanchez de Muniainek atzo leporatu ziona: fabore tratua izan zuela kontratazio horretan.
Perezek nabarmendu duen bestea da, bere gurasoak Artikako kontzejuko kide direla bai, ama presedentea zela, baina, lan deialdi horretan ez zutela esku hartzerik izan.
"Beldurraren kanpaina, gezurrarena eta irainarena ari da UPN erabiltzen", ohartarazi du. "Beldur da alderdia, Podemos-Ahal dugu Gobernura iritsi eta alfonbrak altxatuko ditugulako", esan du Perezek. "UPN bere kolkoari begira baina,ez da jarri, zerrendetan inputatutako hautagaiak dituelako, Artikako kontzejuko UPNko kidea tartean".
