Gose taldeak eta Joseba Sarrionandia idazleak disko berezia sortu dute elkarlanean: Gosariak. Alboan izan dituzte, gainera, Iñigo Arregi eta Juan Luis Goikolea artista plastikoak. Sarrionandiak sortutako testuak kanta bilakatzen dira Goseren eskutik, eta era berean irudi bihurtzen dira Arregiren eta Goikolearen lanari esker. Nortasun, elementu eta espazio anitz eta desberdinek bat egiten dute bost zentzumenak elikatzen dituen obra osatzeko. Lan horretan oinarriturik kontzertua eskaini du Gosek Iruñeko Zentral Kafe Antzokian, ostiralean, hilaren 13arekin.
Kontzertu horren besperaren bezperan Euskalerria Irratian izan dugu Ines Osinaga Goseko abeslari eta trikiti jotzailea. “Luxu handia, erronka berezia, opari ederra eta esperientzia zoragarria izan da Sarrirekin sortzea disko hau. Oso letra bisualak dira, film laburrak, ipuinak idatzi ditu”, azaldu digu. Musikari dagokionez, disko elektronikoa egin dutela azpimarratu du kantari arrasatearrak: “Betiko Gose aurkituko duzue lan honetan. Gitarrak eta trikitia”. Trikitia esku artean duela hain zuzen, 'Alegrantziaren aldeko konjura' kantua abestu du trikitiaren konpainia noblean, eta entxuferik gabe.
