Erakundeen erantzunaren faltan, modu autogestionatuan kale gorrian bizi diren pertsonei babesa emateko helburuarekin sortu da Negu Gorriak - Derecho a techo ekimena, Iruñean. Samira Calvo ekimeneko kideak nabarmendu bezala, egoera gero eta okerrera doa, ez bakarrik gero eta jende gehiago badagoelako kalean bizitzen, baizik eta modu sistemikoan gertatzen ari direlako. "Gure hirian dagoen errealitate bat da eta ezin dugu beste alde batera begiratu". Horren adibide argi dira Jaso ikastola zaharrean edota Aranzadin ematen ari diren asentamenduak, gutxieneko baldintza duinik ez dituztenak.
Horren aurrean, hainbat elkarte eta eragilek urteak daramatzate erakundeei, bai Iruñeko udalari baita Nafarroako Gobernuari ere, irtenbide duinak martxan jarri ditzaten eskatzen. "Jakin badakigu Iruñean hainbat eraikin badaudela horretarako aproposak izan daitezkeenak, tartean Alde Zaharreko Oscus eraikina edo autobus geltoki zaharreko goiko solairuak, orain hutsik dagoena". Iruñean dauden eraikin huts guztien txostena argitaratzeaz gain, Negu Gorriak ekimenetik prozesu burokratikoetako batzu arintzea edo erraztea ere eskatu diote udalari, tartean padroiari dagokiona. Prozesu hauek, eskatzen dituzten epe eta paper kudeagatik, zailtasun gehiagarria dira muturreko egoera larrian dauden pertsonentzat. Prozesua bera baztertzailea bilakatzen da, hartara.