Samara Velte EHUko ikerlaria da eta Iñaki Sagardoi NUPekoa, eta elkarrekin, ikerlari talde batek lagunduta, libertimenduak izan dituzte aztergai azken hiru urteetan. Eta arakatutakoaren ondorioak plazaratzeko jardunaldia antolatu dute: 'Libertimendua: gazteak, komunitatea, ahotsa'.
Velterentzat libertimendua “urteko gertakizunen komentario kolektibo bat” da; “trapuak garbitzen dituzte plazan”, gaineratu du Sagardoik. Ikertzaile bezala, “interesatzen zitzaigun aztertzea horrelako praktika kultural bat sortzen denean eta gainera ikusten dugunean oso ondo funtzionatzen duela, arrakasta daukala, eta gainera euskaraz funtzionatzen duela. Guk ikertu nahi genuen horren atzean zer zegoen”, azaldu du Veltek.
“Komunitatea trinkotzera heldu dira” dio Sagardoik eta aitortu du Veltek: “ez da inor konbentzitu behar parte hartzeko, jendeak nahi du”. “Aho beroek esaten dute egungo gazteek ez dutela konpromisorik hartzen eta libertimendua heldu da hori kontrajartzera”, azaldu du NUPeko ikerlariak.
Behin behineko ondorioak plazaratuko dituzte ostiralean eta parte hartu dutenei eta Sagardoik azpimarratu bezala, “itzulpen bat egin nahi diegu”. Bidean burua gehiegi ez ote duten galdu ikusteko balioko diela ariketak uste du Sagardoik.
Bertaratzeko izena eman behar da.
