Hondarreko beroa izan daiteke jeiki berri den gorputz batek ohe nahasian uzten duen arrastoa, edo bitrozeramika itzali ondoren ez ukitzea abisatzen digun H hizkia. Hondarreko beroa ere bada eguzkiak berotu dituen hiriko kale bateko lurreko lauzak mantentzen duten epeltasuna. Guzti hori eta gehiago da hondarreko beroa Iñigo Satrustegirentzat, berriki Iruñea Hiria Nazioarteko Poesia Sariketa irabazi duena Hondarreko berorik gelditzen bada poesia lanarekin.
Idazlea, sortzailea eta editorea izateaz gain, Euskalerria Irratiko kolaboratzaile ere badenarekin errepasoa egin diogu liburuari. Satrustegiren poesiak asko du inguratzen duen egunerokotasunetik, izan etxeko sukaldeko bitrozeramikaren argi gorria edo bizilagunen bizitza asmatzeko tartea ematen digun balkoiko unea. Baita, zergatik ez, zebrabidea gurutzatu bitartean burutik pasatzen zaigun pentsamendu haria ere.