Lodosako pikilloa, Gernikako piperrak eta Ezpeletteko piperrak bat eginda ikusi ditugu gaur Tokiko Produktuen hamargarren azokan, Gazteluko plazan igandera arte egonen den erakusleiho horretan. Bi mila pintxo inguru prestatu dituzte bertatik bertara hiru piper mota horiekin.
Lodosakoa, Gernikakoa eta Ezpelettekoa piperrak dira denak, baina nortasun handikoak denak. RetPIM proiektuaren baitan, Akitania Berria, Euskadi eta Nafarroa ari dira parte hartzen: euren produktuen inguruko esperientziak partekatu eta ezagutu bakoitzaren zailtasunak eta indarguneak non dauden. Azoka batean elkartu dira denak, jendaurreko salmenta zuzena egitea baita helburuetako bat.
Tokiko hamargarren azokan 45 postu aurki daitezke eta piperrez gain: gazta, arrautzak, eztia, goxokiak, txokolatea, esnekiak, pastak… aurki daitezke. Goizez eta arratsaldez zabalik izanen dira igandera arte.