Bertsotan irudikatuko dute askok Odei Barroso, Barakaldon jaiotako Urruñarra. Baina horren aurretik rapean aritzen zen. 2zio taldearekin hiru disko atera zituen eta 2022an bakarkako ibilbidea abiatu zuen Terapia izeneko lan luzearekin. Orain bere bigarren diskoa kaleratu du, Goizegi hiltzeko izenekoa. 15 kantu dira guztira. “Disko naturala eta zintzoa da nire buruarekin. Nire inguruan ikusten ditudan gaien inguruan kantatzen dut. Badira gai sozialak, politikoak edota pertsonalak. Baina ez dut leziorik eman nahi nire kantuekin, ez naiz nor esateko besteei zer dagoen ongi edo gaizki. Gaiak nire filtrotik pasatzen ditut eta eskura jartzen ditut”, adierazi digu abeslari urruñarrak.
Gaur, ekainak 13, Totem aretoan entzuteko aukera izango dugu, gaueko 9etatik aurrera. Aurretik, Metropoli Forala saiora gonbidatu dugu.