“Ibercajak emakume bat bota nahi du haren etxetik”, salaketa hori egin du Iruñerriko Etxabizitza Sindikatu Sozialistak. 2005az geroztik bizi da bere etxean, Artikaberrin emakumea eta orain hipoteka ordaintzeko arazoak sortu zaizkionean etxetik bota nahi dute: “Hipotekaren zenbatekoetan izandako igoerekin ezin dio aurre egin ordainketei. 700 euroko soldata du eta hilero 1.000 euro baino gehiago ordaindu behar dizkio bankuari”, azaldu du Iruñerriko Etxebizitza Sindikatu Sozialistako Ainhoa Mendiluzek.
Egunotan sindikatu horrek informazioa banatu du bizilagunen artean egoera zein zen jakin zezaten eta atzo batzarrean bildu ziren gaia aztertzeko. Bihar 08:30ean protesta egiteko deia hitzartu dute Artikaberriko Maiatzeko Amak kaleko hirugarrenean: “Emakumeari babesa helarazi eta etxegabetzea gelditu nahi dugu”, adierazi dute. Ainhoa Mendiluzeri egindako elkarrizketa argazkiari klik eginda entzun daiteke.
