Etxegabeak ostatuetan hartzeko programa kritikatu dute Iruñeko etxebizitza sindikatuek. Etxerik ez dutenei eskainitako alternatiba horiek "ogi apurrak" direla salatu dute Harituk eta Iruñerriko Etxebizitza Sindikatu Sozialistak. "Ostaletako logelak eskaintzen dizkieta, baina badira familiak sei hilabete daramatzatenak halakoetan bizitzen", kritikatu du Martin Zamarbide Haritu taldeko kideak.
EH Bilduk Iruñeko aginte makila abenduaren amaieran hartu ostean, Joseba Asiron alkateak lehentasun jarri zuen etxerik gabekoei arreta ematea. Ordutik, baliabideak bikoiztu egin dituzte. Aterpetxeetako eskaintza handitu eta gaua pasatzeko hostal eta hoteletako zenbatekoa ere gehiago da orain. Arazoak irtenbide integrala behar duela ere badakite eta lanketa horretan ari dira.Bada, joan den ostiralean Iruñerriko Etxebizitza Sindikatu Sozialistak agerraldia egin zuen bide hori kritikatzeko. Iruñean 5.000 etxebizitza huts daudela adierazi dute eta horiek herritarren eskura jarri beharko liratekeela: "Etxebizitzak negozio izateari utzi eta eskubide izaten hasteko bideari eutsi behar zaio", aldarrikatu du Zamarbidek.
Asteazkenean epaiketa
Bost lagunek epaiketa izan dute asteazkenetik aurrera Iruñeko Bloke Sozialistako etxegabetzeei lotuta. Bloke hori azaroan hustu zuen Poliziak orduko Iruñeko Udalaren aginduz. Han zirenei elkartasuna adieraztera joan ziren bost pertsona salatu zituen UPNk eta salaketak mantentzea erabaki dute EH Bilduk, Geroa Baik eta Zurekinek. Elkartasuna kriminalizatzen aritzea leporatu diete Etxebizitza sindikatutik. Asteazkenean Iruñeko Epaitegian hasiko den epaiketa salatzeko eta epaituei babesa adierazteko ordu batean elkarretaratzea eginen dute.
