Alicanteko portura abiatu zen atzo 16 tona inguru daramatzan kamioia laguntza humanitarioa sahararren kanpalekuetara helarazteko. Anarasd Gobernuz Kanpoko Erakundearen arabera 174.000 pertsona inguru bizi dira kanpalekuetan nazioarteko laguntzatik, eta, kamioiak, besteak beste, hezkuntza materiala, testu liburuak osatzeko materiala, 1.425 kilo sendagai, osasun-materiala; eta Nafarroako Osasunbideak dohaintzan emandako desfibriladore bat eta elektrokardiografo bat eramanen dizkie errefuxiatuei.
Kamioia halaber, artelan bihurtu dute Adrián Pérez, Ignacio Ainzua, Daniel Gutiérrez eta José Mari Ojer artistek. Saharar herriaren argia eta iluna, eguna eta gaua irudikatuko dute kamioiaren alde bietan, “Sahara libre” dioen mezuarekin batera.
Ramadanaren amaierako ospakizunarekin batera egin du Anarasd elkarteak bidalketa. Erakundeak zehaztu bezala, tradizioa jarraituz, opariak egiten baitzaizkie haurrei. Hartara, bizi-hornidurez gain bestelakoak ere sartu dituzte kamioian, Charo Prado Anarasdeko koordinatzaileak adierazi duenez, “ilusioa, itxaropena eta babesa” ere bidali nahi izan dituzte.
Euskalerria Irratian Anarasd Gobernuz Kanpoko Erakundeko Fede Saenz de Santamaria elkarrizketatu dute; argazkian klik eginda entzun daiteke.
EUSKALERRIA IRRATIAzale hori:
FM 98.3ko zein euskalerriairratia.eus webguneko edukiak musu truk entzun, irakur eta ikus ditzakezu.
Zuretzako eskari bat dugu: posible baduzu, lagun gaitzazu gero eta eduki gehiago eta hobeak sortzen, Iruñerriko euskaldun ororen eskura jartzeko.
Izan ere, zenbat eta komunitate handiagoa, orduan eta proiektu komunikatibo eraginkorragoa.
Bazkidetu zaitez!