"Hankaz gora aurkitu ditugu haur eskolak. Erronka handiak ditugu aurretik. Eskaera eta eskaintzaren beharrak erantzun behar ditugu", adierazi du Maider Beloki Kultura, Festak, hezkuntza eta Kirol zinegotziak. Egoeraren lehen diagnostikoa egiten ari dira zehazki haur eskolen afera nola dagoen jakin eta eraldaketa nondik hasi jakiteko. "Haur eskola berria eraikiko dugu Donibanen espetxe zaharra zegoen orubean", iragarri du.
Eredu pedagogikoa zehaztu behar dute orain eta familia zaurgarrienenganaino iritsi nahi dute era berean. Lehen diagnistikoak erakutsi diena da UPNren bost urteetan eredu linguistikoak "pikutara" bidali dituela: "Oreka bat egon behar da euskaraz eskaintzen eta eskatzen diren plazen artean", azaldu du. Gerentzia eta zuzendaritza teknikoan pertsona berriak daude lanean dagoeneko (2015-2019 legealdian zeuden berberak) eta analisi sakona egiten ari dira aldaketak nondik hasi zehazten hasteko.
Festak bizilagunen esku ere egonen dira
Kalejirak iritsiko dira laster inauterien iritsierarekin batera. "UPNren obsesioen artean egon da erraldoien konpartsak eta jai girokoak espaloitik joatera behartzearena", esan du. Hagatik, errepidetik joaten ahalko dira halako ekimenak eta horretarako segurtasun neurriak hartuko dituzte. "Normaltasunera itzuli nahi dugu eta espazioa eman festa giroko ekimenei", jakinarazi du.
Sanferminetan txupinazoa nork jaurtiko duen erabakitzea ere bizilagunen esku utziko dute: "Parte hartze prozesua zabalduko dugu berriz ere". Iruindarrek jai irekiak nahi dituzte, kolektiboek espazioak galdegiten dituzte eta jendeak parte hartu nahi du aktiboki Belokiren ustez. Euskalerria Irratian egindako elkarrizketa osorik entzuten ahal da argazkian klik eginda.
