Alianza por el clima Nafarroa plataformak antolatuta, astearte honetan 19:00etan, Deskalzos kaleko 56an, UPNko Miguel Bujanda, PSNko Javier Lekunberri, EH Bilduko Mikel Zabaleta, Geroa baiko Pablo Azkona, Contigo/Zurekineko Eva Ortega, Greenpeaceko Nafarroako ordezkaria Lorea Flores eta Rafa Alday, Ekologistak Martxaneko kidea solasean arituko dira Nafarroan egin denaz eta egin beharko litzatekeenaz. Mahaingurua streaming bidez eskainiko da Reas-en you-tube kanalean.
Irrintzi Plaza saioan Lorea Floresek aurreratu digu nondik nora joanen den biharko hizketaldia.
Nafarroan mugarri garrantzitsua izan zen, 2022ko martxoaren 30ean Klima Aldaketari eta Trantsizio Energetikoari buruzko Foru Legea aho batez onartu zenean. Hiru urte lehenago, 2019ko irailean, Nafarroako Gobernuak eta Parlamentuak larrialdi klimatikoari buruzko adierazpen bana sinatu zuten. Hala ere, paperetik harago ezer gutxi egin da Nafarroan klima aldaketari aurre egiteko edota aldaketari egokitzeko.
Datuak gero eta larriagoak dira. Horrela, Klima-aldaketari buruzko Gobernuarteko Adituen Taldeak argi adierazi du horrela jarraituz gero mende bukaerarako 4,4 gradu igoko dela planetaren tenperatura eta ezinbestekoa dela hemendik eta 2030era bitarte gas isurketak %50 murriztea.
