Beñat Rodrigo Kiliki Frexko musikaria Metropoli Forala saioan izan dugu. Chill Mafia taldeko kideak azaldu digunez, 2021. urtearen hasieran, Gazte arruntaren koplak eta Barkhatu x Barruan Gaude mixtape hura plazaratu zituztenetik denbora ziztu bizian pasatu dela iruditzen zaio.
Bestalde, Kiliki Frexkok esan digu aurreiritzi asko dagoela haiek jorratzen duten musika estiloaren aurrean eta gauzak egiteko maneraren aurrean. Kalitate teknikoari dagokionez, azpiegitura hobeak dituzte, orain. Hala esan digu Arrotxapeko artistak. Musikaren industria barrutik ezagutzen ari diren honetan, "nazkagarria bezain beharrezkoa" dela dio. Bakarkako bidea egiteari ez diola muzin egiten aitortu digu. Aurki, gauza berriak datozela aurreratu digu.
