Energia berriztagarria ekoizteko 58 proiekturi helegitea jarri die Sustrai Erakuntzak

Euskalerria Irratia 2021ko abu. 27a, 12:50

Era nahasian eta inolako plangintza demokratikorik gabe ematen ari da energia berriztagarria ekoizteko proiektu handien hazkundea Nafarroan. Proiektu multzoaren azterketa egin du Sustrai Erakuntza fundazioak, eta hala baieztatu dute. Martin Zelaiarekin hitz egin dugu Euskalerria Irratian.

Gero eta gehiago eta handiagoak dira Nafarroan eraiki nahi dituzten haize eta eguzki energia ustiatzeko poligonoak. Abuztuaren bataz geroztik, gutxienez, zazpi proiektu berri jarri dira jendaurrean Nafarroan. Horietako bat da Sacyr enpresa taldeak Iruñerriko iparraldean egin nahi duena. Berez hiru poligono eoliko ezartzeko plana aurkeztu du, Erro, Esteribar, Anue eta Olaibar bailaretan. Sustrai Erakuntza Fundazioaren ustez, ordea, bakarra da eta legea saihesten ari dira zatituz. 

Parkeak 25 kilometroko luzera duen linea elektriko bat ezartzea aurreikusten du, elektrizitatea Orkoienera eramateko eta guztira 200 metroko altuera duten 29 haize errota ezarri nahi dituzte. Azpiegiturak basoetan, landaredian eta hegaztien faunan izango zukeen eraginaz ohartarazi du Zelaiak.

Klima aldaketari aurre egiteko aitzakiapean ari dira proiektuak onartzen, baina eragina kontuan izanda, energia berriztagarria horrela sortzea kontraesankorra da Sustrai Erakuntzaren ustez. Hori dela eta, parke txikiagoak hartuko dituen eredua eta kontsumo ohitura jasangarriak ezartzea ezinbestekoa dela azpimarratu du.

EUSKALERRIA IRRATIAzale hori:

FM 98.3ko zein euskalerriairratia.eus webguneko edukiak musu truk entzun, irakur eta ikus ditzakezu.

Zuretzako eskari bat dugu: posible baduzu, lagun gaitzazu gero eta eduki gehiago eta hobeak sortzen, Iruñerriko euskaldun ororen eskura jartzeko.

Izan ere, zenbat eta komunitate handiagoa, orduan eta proiektu komunikatibo eraginkorragoa.


Bazkidetu zaitez!