Lur Albizu: "Kritika politikoak adierazpen askatasunaren barruan egon beharko luke"

Urriaren 12ko ekitaldiagatik gaur hastekoak ziren deklarazioak atzeratu dituzte. Koroaren aurkako delitua leporatu diete Iruñerriko hamabi gazteri, Felipe VI. Espainiako erregearen eta Cristobal Colonen estatuak eraisteagatik. Lur Albizu Etxetxipia da horietako bat.

Koroaren aurkako delitua leporatu diete Nafarroako hamabi laguni, urriaren 12an Felipe VI. Espainiako erregearen eta Cristobal Colonen estatuak eraisteagatik Gora Herriak! ekitaldian. Gaur, bihar eta ostegunean ziren deklaratzekoak, telematikoki. Baina, atzeratu egin dituzte, denboraleak Madrilen eragindako egoeraren ondorioz. Lur Albizu Etxetxipia da ikertuetako bat. 

Atzo goizean jakin zuten, abokatuen bitartez, deklarazioak atzeratu dituela Espainiako Auzitegi Nagusiak. "Otsailean izanen dira seguru aski", azaldu dio Euskalerria Irratiari Albizuk. Deklarazioen berezperan ikertuek, 50 eragileren babesa jaso zuten. "Egun zoroa izan zen atzokoa, atzeratu denaren berria, denak abisatu behar eta elkartasun mezuak, aldi berean. Oso erantzun zabala izan du eta oso eskertuta gaude". Babesa agertu dutenen artean daude EH Bildu eta Nafarroako Ezker Batua; baita LAB, Steilas, EHNE, CGT eta Iruñeko CNT sindikatuak ere. Babesa adierazi dieten gainerako eragileak Nafarroako eta Iruñeko elkarteak dira, auzo eta arlo askotakoak: Sare, Bilgune Feminista, Nafarroako SOS Arrazakeria, Alde Zaharreko Gazte Mugimendua, San Fermines 78 Gogoan, Salhaketa, Altsasu Gurasoak...

Iragan urriaren 12an, Sortuk eta nazioarteko hainbat elkartek Gora Herriak! izeneko ekitaldia egin zuten Iruñean, eta Felipe VI. Espainiako erregearen eta Cristobal Colonen itxura zuten bi estatua eraitsi zuten hainbat lagunek. Ekitaldia eta auzia Iruñean gertatu izana nabarmendu du Albizuk: "Polizia Nazionalak eta Guardia Zibilak egindako atestatu batean oinarritzen da, eta hori Iruñean gertatzen da bakarrik". 

Auzia salatzeko eta ikertuei elkartasuna adierazteko manifestazioa eginen dute larunbatean, 17:30ean Iruñean.