Mugimendua beste modu batera bizitzeko espazioa da Zerumuga. Gimnasioetan urte luzez lanean aritu ondoren, Izaskun Marturetek proiektu propioa sortzea erabaki zuen, aireko tekniketan oinarritutako jarduerak eskaintzeko. Aeroyoga, Antigravity, aireko dantza edo Bungee bezalako diziplinen bidez, ariketa fisikoa eta ongizatea uztartzen dituzte.
Martureten esanetan, aireko teknikek indarra eta malgutasuna lantzeko aukera ematen dute, baina onurak harago doaz. Buruz beherako posturen bidez bizkarrezurra deskonprimitu, muskuluak erlaxatu eta gorputzarekin konektatzeko aukera eskaintzen dute. Horregatik, mugimendu kontzientea da saio guztien oinarrietako bat.
Izaskun Marturet Guardasola saioan izan da, Zerumuga proiektuaz eta aireko diziplinek eskaintzen dituzten aukerez hizketan.