Mugimendu Feministak salatu du, orain arte, gutxienez intentsitate baxuko 14 eraso sexista salatu direla eta uztailaren 8an emakume baten sexu indarkeria saiakera larria jasan zuela. Erasotzaileak indarkeria erabili zuen emakumearengan eta emakumeak ihes egitea lortu zuen aurre egin ziolako.
Iruñerriko Mugimendu Feministak maitasun mezua eta babes osoa eskaini dizkio eraso larria jasan duen emakumeari. Horrekin batera nabarmendu dute jaiak ere emakumeenak direla eta espazio horiek betetzen segituko dutela. Askatasunez eta askatasunean festez gozatzeko eskubidea aldarrikatu dute. Hartara, uztailaren 12an, igandearekin Gazteluko plazan iluntzeko bederatzietan elkarretaratzera dei egin dute. Emakumeok bizi ditugun egoerak salatzea izanen da xedea.
Udalaren mezua erasoen aurrean
Joseba Asiron Iruñeko alkateak azaldu du, orain arte sexu erasoen inguruan aurkeztutako salaketa guztien ustezko egileak atxilotu dituztela. Nabarmendu du erakundeek lanean jarraituko dutela mugimendu feministarekin batera, prebentzio neurriak, protokoloak eta biktimei ematen zaien laguntza indartzeko. Alkateak azpimarratu du emakumeen eskubideak erabat bermatu behar direla jaietan ere, eta eraso sexistek ez dutela lekurik sanferminetan.