30 urteko ibilbidea, 20 disko eta taldearekin partekatutako eszenatoki kopuru kontaezin baten ondoren, Mikel Urdangarinek bidaia berri bati ekingo dio: Uhina. Eta bidaia hori bihar, asteazkenarekin, iritsiko da Iruñera, Katakrak aretora zehazki, arratsaldeko 19:00etan. Jatorrira itzulera bat izanen da, artistaren, gitarraren eta publikoaren arteko elkarrizketa intimoa. Aukera paregabea abestiak jaio ziren bezala, bere erarik garbi eta funtsezkoenean entzuteko.
Urdangarinek azpimarratu bezala, bira hau erronka bat ere bada, nolabait. "Emanaldiak leku berezietara, ohiko eszenatokietatik kanpo eramateko asmoa daukagu. Izan liburu-dendak, museoak edo bestelako espazioak". Izan ere, eszenatoki handiagoetara eta taldearen babesarekin jotzera ohituta dagoen arren, bakarka jotzeak eskaintzen duen intentsitatera bueltatzeko gogoz ere badago abeslaria: "Biluzte moduko bat ere bada, nahiz eta ez zauden inoiz bakarrik: gitarra daukazu, kantuak eta hitzak dauzkazu, zer kontatu ere badaukazu. Baina egia da musikari bezala intentsoa dela, oso giro berezia sortzen da publikoarekin batera kontzertuetan". Sarrerak abeslariaren webgunean bertan eskuratu daitezke.